Saturday, 26 December 2009

• 冇野做既Boxing Day

  頭先先發現，原來尋晚寫blog，post 左3個entries 出來。
  
  今日成日都係屋企，淨係掛住訓覺同睇facebook，悶得很。
  睇來我呢個懶人近排變毒左好多。
  
  之前有一個朋友同我講，“你個樣似係個D成日都有節目既人”
  其實真實情況係相反。
  特別係假期既時候，好多時候都係等人約我。
  
  呢排Facebook 好似來來去去都係咁，冇咩新意。
  每次慣性咁click 個shortcut，都係同一個畫面，又冇咩updates。
  
  今個假期，真係冇咩做。
  原本諗住睇《阿凡達》，但身邊好多人都已經睇左，
  加上呢幾日戲飛一票難求，所以暫時作罷。
  可能下個星期去數碼港睇，因為早場70，其他場都只係90。
  又近又抵，真係諗得過.....
  
  反而睇左《Twilight 2：new moon》
  well，好坦白講，我冇睇第一集，所以我睇得好辛苦，
  特別佢個故事係連貫的，唔似《哈利波特》每集一個新故事，
  就好似由中間開始睇咁，「一直係度諗邊個打邊個」，「點解會有呢個人？」
  睇完之後，可能個腦仲run 緊，所以呆下呆下咁。
  見到外國人仲特登望下佢隻眼係唔係紅色。 =＿=
  番到屋企，睇人地Xmas Ball 既相，點知好多都係紅眼＠＠
  嚇鬼....
  
  前個兩日都係同ivan 過，同佢farewell
  平安夜個日，我，ivan，同俊彥，曹子健去左ivan 屋企打牌xd
  佢副麻將係中型版，即係比正常細少少，又唔係迷你版個D，
  好記得有一次行過住好D，都有D心郁郁想買
  仲有張膠墊，所以打個時都好靜。
  
  之後去左時代廣場既滬江食晚飯，（相信應該有人依家諗「又滬江？」）
  哈哈，其實當我諗唔到食咩既時候，其他地方又唔sure booking 既時候
  佢通常都會係我第一選擇。
  因為佢真係好岩四五個人，係一個氣氛唔錯既環境，好舒服咁食一餐晚飯。
  咁岩平安夜好多地方都book 唔到，而ivan 去到澳洲後又未必會有機會食上海菜，
  所以就搵左佢，好在仲有位， 呵呵。
  
  餐飯我地都好滿意，特別係叫既菜，唔係成日食，
  ivan 話有D佢從來都未食過，好好食，
  去到食甜品既時候，大家覺得好新奇。XD
  加上我地坐沙發卡位，所以坐得好舒服。
  四個人食左四百多，係銅鑼灣來講，大家都覺得抵食。
  又再一次證明滬江確係一個唔錯既晚飯地方。
  
  食完飯，我地又番ivan 屋企，繼續雀局，哈哈去到十一點先走。
  好在有的士，唔係由干德道頭落番山，
  都咪話唔驚，話說學校後面條斜路咁黑，真係咪搞我。
  第一次咁夜坐車經過學校，見到8樓既汽水機係黑暗中放出耀眼既光芒 wow...
  
  到聖誕節，好似我尋晚咁講，唔覺有咩氣氛。。。。
  尋日係我第一次係自己屋企開枱，哈哈，原來硬件配套都唔錯，
  打牌可以張我張正方形枱發揮到佢既極致。
  反而可能坐地下坐得耐會痺，睇來要添置多d設備，等大家坐得舒服D.......
  但大家都幾滿意。哈哈，又多一個地方打牌了。
  睇來跟住落來我都有雀局XD
  
  夜晚去左auntie屋企食飯，經過SoHo，都唔多人係度慶祝。
  第一次係聖誕節會覺得熱（我指香港），
  我都係鐘意凍少少既天氣。
  
  過埋今個禮拜，下個禮拜又要補習喇，28同30朝早都要上Joe Chan，兩個半鐘，
  發現我自己已經冇以前咁專心，開始係度send sms。
  始終上兩個半鐘唔係一件易事，好在有人陪我一齊上：）
  
  聽日既節目：打牌XD
  
  Bye~
  
  

  • 11:48 PM
  • 9 Views
  • add eprops
  • add comments
  • email